Buyuk Britaniyaning Birmingem shahrida mashhur komediyachi Peter Kay ishtirokidagi shouda bomba qo‘yilgani haqidagi yolg‘on xabar tufayli tadbir to‘xtatilib, odamlar evakuatsiya qilingan edi. Endi shu ish bo‘yicha 19 yoshli yigitga ayblov e’lon qilindi.
G‘arbiy Midlend politsiyasining ma’lum qilishicha, Birmingemning Vashvud Xit tumanida yashovchi Omar Majedga yolg‘on ma’lumot tarqatish aybi qo‘yilgan. U dushanba kuni shahar sudiga olib kelinadi.
Juma oqshomida "Utilita Arena"da bo‘lib o‘tayotgan shouda shubhali sumka qoldirilgani haqida xabar kelib tushganidan so‘ng, arena zudlik bilan evakuatsiya qilingan va komediyachi sahnadan olib ketilgan edi.
Politsiya xodimlari hududni tekshirib chiqqanlaridan so‘ng, "hech qanday shubhali narsa topilmadi", deya ma’lumot berdi. "Hamkorlik va tushunganliklari uchun barchaga minnatdorchilik bildiramiz", deyiladi politsiya bayonotida. "Har doimgidek, bizning ustuvor vazifamiz – jamoat xavfsizligini ta’minlashdir."
Peter Kay o‘z chiqishining taxminan 45-daqiqasida edi, shou to‘xtatildi. NEC Group vakilining so‘zlariga ko‘ra, chipta egalariga chiptani sotib olgan joylari orqali keyingi qadamlar haqida ma’lumot beriladi.
"Utilita Arena Birmingem" shanba kuni ertalab X (sobiq Twitter) sahifasida evakuatsiya paytida hamkorlik qilgan tomoshabinlarga minnatdorchilik bildirgan. Arena shanba kungi shou reja bo‘yicha davom etishini ma’lum qilib, qo‘shimcha xavfsizlik choralari haqida ham axborot bergan.
Bu shoular Kayning "Kech bo‘lsa ham, hechdan ko‘ra yaxshi" nomli milliy gastrol safari doirasida bo‘lib, undan tushgan barcha foyda saraton kasalligi bilan kurashuvchi 12 ta yirik xayriya tashkilotiga o‘tkaziladi. Komediyachi Belfast, Liverpul, Sheffild va Lids shaharlarida ham chiqish qilishi rejalashtirilgan.
Mənbə: BBC News
