Snuker boʻyicha jahon chempionatining yarim finalida kutilmagan natijalar qayd etildi. Xitoylik yosh iqtidor Wu Yize dramatik bahsda Mark Allenni magʻlub etib, final yoʻllanmasini qoʻlga kiritdi. Ikkinchi yarim finalda esa Shaun Murphy Jon Higginsni yengib, finalga chiqdi.
Mark Allen uchun bu magʻlubiyat juda ogʻir kechdi. U hal qiluvchi freymda gʻalaba qozonish uchun oddiy qora sharni oʻtkazib yubordi. Bu xato uning ilk bor jahon chempionati finaliga chiqishiga toʻsqinlik qildi.
22 yoshli Wu Yize, Xitoy snukerining yangi yulduzi sifatida koʻrilmoqda. U 16-14 hisobida ortda borayotganiga qaramay, ketma-ket uchta freymni 67, 52 va 71 ochkolik seriyalar bilan yutib, 17-16 hisobida gʻalaba qozondi. Bu "Crucible" tarixidagi eng unutilmas oʻyinlardan biri boʻldi.
Allenning soʻzlariga koʻra, u imkoniyatlarini qoʻldan boy bergan va bosimga dosh bera olmagan. "Bunday qora sharni oʻtkazib yuborsang, gʻalabaga loyiq emassan. Wu Yizega omad tilayman. Menimcha, u jahon chempioni boʻladi", dedi Allen.
Wu Yize endi yakshanba kuni Toshkent vaqti bilan 17:00 da boshlanadigan finalda Angliyalik Shaun Murphy bilan kuch sinashadi.
Olti karra jahon chempioni Stiv Devis va 2024-yil gʻolibi Kyren Uilson, BBC Two studiyasida tahlilchi sifatida ishlashayotgan edi, Allenning tushunarsiz xatosini koʻrib hayratda qolishdi. "Bunday bosqichda har qanday xatoni kechirish mumkin. Mark Allenni tushunaman, u hozir shokda", dedi Devis.
Uilson esa Allenning zarba berish texnikasini shubha ostiga oldi. "Mark Allenning qoʻl holatiga qarang. Stolga qoʻlini qoʻymagani meni hayratga soldi. Qoʻlini stolga qoʻyganida bu sharni oʻtkazib yubormasdi", dedi u.
Wu Yizening gʻalabasi Xitoyning ketma-ket ikkinchi yil finalchiga ega boʻlishini anglatadi. Bu uning 16 yoshida Buyuk Britaniyaga koʻchib kelib, snuker orzusini roʻyobga chiqarish qarorini oqladi. Wu, dastlab derazasiz kvartirada otasi bilan bir karavotda yashagan, endi sportning eng katta mukofotidan va 500 000 funt sterlinglik chekdan bir gʻalaba uzoqda.
"Hali ham hayajonim bosilmayapti. Markdan afsusdaman", dedi Wu gʻalabasidan soʻng. "Oʻyinni yutqazayotgandek his qildim, ayniqsa oʻsha freymdagi ikkinchi qora sharda. Lekin imkoniyatdan foydalana oldim. Jahon chempionligini qoʻlga kiritish uchun bor kuchimni ishga solaman."
Shaun Murphy esa oʻzining beshinchi "Crucible" finaliga chiqish uchun Jon Higginsni 17-15 hisobida magʻlub etdi. U 21 yil oldingi ilk chempionligidan soʻng ikkinchi titulini qoʻlga kiritishni maqsad qilgan.
Murphy 13-11 hisobida ortda borayotganiga qaramay, ketma-ket toʻrtta freymni yutib, oʻyinni oʻz foydasiga hal qildi. "Juda xursandman, charchadim. Jon bilan toʻrt sessiyalik jahon yarim finalida oʻynashdan qiyini yoʻq", dedi Murphy.
Sakkizinchi raqamli snukerchi Murphy oʻyinni 132 va 127 ochkolik ajoyib seriyalar bilan boshladi. Ammo Higgins ham oʻzining tajribasi va jangovar ruhi bilan javob qaytardi.
Murphyning uchinchi yuzlik seriyasi hisobni qisqartirdi va Higginsning xatolaridan soʻng, Murphy oʻz oʻrnini snukerning eng nufuzli oʻyinida mustahkamladi. Endi u 1977-yildan beri turnir Janubiy Yorkshirga koʻchirilganidan buyon bir nechta jahon chempionligini qoʻlga kiritgan olti oʻyinchi qatoriga qoʻshilishni maqsad qilgan.
Mənbə: BBC News
